TAGBILARAN CITY, Bohol, Oct. 8 (PIA) -- Samtang ang presyo sa palit sa humay nga wala na ibuwad pa, sa kinatibuk-an nga rehiyon sa Central Visayas anaa sa average nga P 17.84 matag kilo, ug tag P 15.11 matag kilo sa tibuok nasud, sa kinatibuk-an nga lalawigan sa Bohol, nagpabilin gihapon kini nga sama sa milabay nga semana nga nga naa na kini sa P18.68 ang matag kilo.

Hinuon, matud sa Philippine Statistics Authority (PSA), taas man ang presyo sa humay sa Bohol, kubos kini sa P6 sa matag kilo sa milabay nga panahon nga diha na sa P24.

Kahinumduman nga ang PSA naghimo sa kaduha ngadto sa ka tulo ka higayon nga pagsurvey matag semana aron ilhon ang presyo sa tipasi didto mismo sa umahan, sa mga tigpamalit sa tinibuok (wholesale) ug retail sa tibuok nasud.

Ang mga resulta sa survey gipailawom sa makuti nga kumpirmasyon ug pagproseso nga molanat pag semana, sa dili pa kini itaho pinaagi sa media, butyag sa PSA.

Kini aron may giya ang mga mag-uuma sa pagpresyo sa ilang ani, ug makabantay ang konsumidor kon may nag-abuso sa presyo nga mga negosyante.

Segun sa kasayuran sa PSA, ang presyo sa tipasi nga wala na ikabuwad pa, sa tibuok Bohol, moabut na kini sa P 18.68 matag kilo, samtang P5.60 kini nga kubos sa milabay nga tuig

Kini nga presyo usab, dili na susama sa nanglabay nga mga semana nga naa lamang sa ubos pa sa P 15.60

Sa uga nga humay tipasi, ang average nga presyo, naa sa 19.10 matag kilo sa kinatibuk-an nga rehiyon samtang naa ra sa P16.18 matag kilo sa nasud.

Sa average nga palit tinibuok, ang presyo sa regular milled rice naa na sa P36.00 matag kilo samtang tag P30.00 lamang kini sa tibuok nasud.

Sa laing bahin, ang retail price sa regular milled rice naa sa P38 matag kilo dinhi sa Bohol bisan kon P39.75 kini sa tibuok rehiyon ug P37.79 sa tibuok nasud.

Segun sa PSA, kini nga hinuon, mas ubos sa P15 sa presyo niini sa milabay nga tuig sa Bohol. (rahc/PIA-7/Bohol)